"সুষম" ছফ্টৱেৰ

 

"ভাষা সাহিত্য সন্মিলনী, অসম"-এ আপোনালোকলৈ আগবঢ়াইছে "সুষম"। ইউনিক'ড পদ্ধতি ব্যৱহাৰ কৰি অসমীয়া লিপিত লিখি উলিওৱা আপোনাৰ যিকোনো লিখা এই নতুন সঁজুলি (চফ্টৱেৰ)ৰ সহায়ত এতিয়া আপুনি অতি সহজে এটা সুষম অৱস্থালৈ আনিব পাৰিব। সাধাৰণতে আমি ব্যৱহাৰ কৰি থকা অসমীয়া লিখন সঁজুলিসমূহে প্ৰত্যেকে ভিন্ন প্ৰক্ৰিয়াৰে কাম কৰে আৰু বহু সময়ত আমি গম নোপোৱাকৈয়ে বিভিন্ন যুক্তাক্ষৰৰ মাজত বঙালী "ৰ" (র) সোমাই যায়। যাৰ ফলত গুগুলকে আদি কৰি বিভিন্ন ছাৰ্চ ইঞ্জিনত আপুনি লিখা অসমীয়া প্ৰবন্ধ, গল্প বা কবিতাক বাংলা হিচাপে দেখুৱাব পাৰে। তদুপৰি ড়, ঢ়, ো বা ৌ কাৰৰ ক্ষেত্ৰতো কিছু খেলি মেলি আহে। কিন্তু "সুষম" নামৰ সঁজুলিবিধে এনেকুৱা সকলো ধৰণৰ খেলিমেলি আঁতৰাই আপোনাৰ লিখনিক এক সুষম আৰু সম্পূৰ্ণ অসমীয়া পৰ্যায়লৈ আনিব পাৰে। ইয়াক চলাবলৈও অতি সহজ; তলত তাৰ বৰ্ণনা কৰা হৈছে। উল্লেখযোগ্য যে "ৰামধেনু" নামৰ চফ্টৱেৰ আৱিষ্কাৰেৰে অসমীয়া ডিটিপি জগতত নতুন দিগন্তৰ সৃষ্টি কৰা শ্ৰীযুত ত্ৰিদিপ কুমাৰ বৰুৱাই "সুষম" নামৰ নতুন সঁজুলিবিধ সাজি উলিয়াইছে আৰু "ভাষা সাহিত্য সন্মিলনী, অসম"ৰ বেনাৰত ইয়াক বিনামূলীয়াকৈ ৰাইজৰ মাজত বিতৰণৰ সিদ্ধান্ত লৈছে। এই ছেগতে আমি সন্মিলনীৰ তৰফৰ পৰা শ্ৰী বৰুৱালৈ আন্তৰিক অভিনন্দন আৰু কৃতজ্ঞতা জ্ঞাপন কৰিছোঁ।

সুষমৰ ব্যৱহাৰ পদ্ধতি:

তলত দিয়া লিংকৰ পৰা ইয়াক ডাউনল’ড কৰি আপোনাৰ কম্পিউটাৰত স্থাপন (ইন্‌ষ্টল) কৰক। স্থাপন হোৱাৰ পাচত ডেস্কটপত নতুনকৈ হোৱা “XUXAM UNICODE” আইকনটোত দুবাৰ ক্লিক কৰি প্ৰ'গ্ৰামটো চলাওক। তাৰ পাছত -

১. আপুনি সুষম কৰিব বিচৰা আপোনাৰ লেখাটো বাছনি কৰি কপী কৰক। আপুনি যিকোনো ৱৰ্ড প্ৰচেছৰ ব্যৱহাৰ কৰিব পাৰে, যেনে এম. এছ. ৱ'ৰ্ড, ন’টপেড, ৱৰ্ডপেড ইত্যাদি।
২. এতিয়া আপোনাৰ কী-বৰ্ডত F10 টিপক বা "সুষম" সঁজুলিত থকা PROCESS STANDARD চুইছত ক্লিক কৰক।
৩. আকৌ আগৰ ঠাইত লিখাটো নতুনকৈ পে’ষ্ট কৰক অৰ্থাৎ আপোনাৰ আগৰ লিখাৰ ওপৰত নতুনকৈ ইয়াক বহুৱাই দিয়ক।

ডাউনল'ড লিংক:
https://www.dropbox.com/s/nu3z4te8xc4pji4/XUXAM%20V_3.rar

সাৱধানবাণী: অসমীয়া ৱিকিপিডিয়াৰ প্ৰবন্ধৰ ক্ষেত্ৰত ইয়াক ব্যৱহাৰ কৰিব পৰা এতিয়াও নাই হোৱা, অনুগ্ৰহ কৰি ৱিকি প্ৰবন্ধত ইয়াক ব্যৱহাৰ নকৰিব।

বি:দ্ৰ:- ৱিণ্ড’জ অ’পাৰেটিং প্ৰণালীত কাম কৰা অসমীয়া টাইপিং সঁজুলিবোৰৰ ভিতৰত “ৰ’দালি” (Rodali) আৰু “আলাগী+” (Azhagi+) ওপৰত উল্লেখ কৰা আসোঁৱাহসমূহৰপৰা মুক্ত।

(লেখাটো ভাষা সাহিত্য সন্মিলনী, অসমৰ ফে'চবুক পৃষ্ঠাৰপৰা সংগ্ৰহ কৰা হৈছে।)

Azhagi+ easy টাইপিং সঁজুলি

Azhagi+ টাইপিং ছফ্টৱেৰটোৰ মূল অসমীয়া লে’আউটখনত সামান্য সালসলনি কৰি এই কীব’ৰ্ডখন প্ৰস্তুত কৰা হৈছে। কেইবাটাও আখৰ টাইপ কৰিবলৈ একাধিক বিকল্প থকা বাবে (আৰু ম‍ই ব্যৱহাৰ কৰি সহজ পোৱা বাবে) ইয়াক Azhagi+ easy নাম দিছোঁ। ইণ্ডিক ইন্‌পুট ২ ছফ্টৱেৰটোৰ টাইপিং পদ্ধতিৰ লগত ইয়াৰ ভালেখিনি মিল থকা বাবে সেইটো আগৰেপৰা ব্যৱহাৰ কৰি থকাসকলে সহজ পাব। ছফ্টৱেৰটোৰে Windows XP, Windows vista, Window 7 আৰু Windows 8 আটাইকেইটা অ’পাৰেটিং প্ৰণালীতে টাইপ কৰিব পাৰি। প’ৰ্টেবল হোৱা বাবে এইটো আপুনি পে’ন ড্ৰাইভত কঢ়িয়াই ফুৰি যিকোনো কম্পিউটাৰতে অসমীয়াত টাইপ কৰিব পাৰিব। উল্লেখযোগ্য যে ত্ৰিদিপ কুমাৰ বৰুৱাই প্ৰস্তুত কৰা “সুষম” ছফ্টৱেৰটোৱে Azhagi+ৰে টাইপ কৰা অসমীয়াত কোনো ত্ৰুটি পোৱা নাই (ম‌ই ব্যৱহাৰ কৰি চোৱা আৰু ত্ৰুটি নোপোৱা আনটো অসমীয়া টাইপিং ছফ্টৱেৰ হৈছে “ৰ’দালি”)।

Azhagi+ easy ব্যৱহাৰ কৰিবলৈ প্ৰথমে তলত দিয়া লিংকটোৰপৰা ফাইলটো ডাউনল’ড কৰক। আন্‌জিপ কৰাৰ পিছত ভিতৰত থকা ফ’ল্ডাৰটো খোলক। তাত থকা Azhagi-Plus (A+ লিখা ছবিখন) নামৰ এপ্লিকেছনটো চলাওক। লগে লগে মণিটৰৰ টাস্কবাৰত “A+”  আইকন্‌টো দেখা পাব। ইংৰাজী আৰু অসমীয়া ভাষাৰ মাজত সালসলনি কৰিবলৈ F10 টিপক। অসমীয়া টাইপিং সক্ৰিয় হ’লে লেংগুৱেজ বাৰত “BN” বুলি ওলাব। কীষ্ট্ৰ’কবোৰ লিখা থকা সহায় পিডিএফ ফাইল এটা ডাউনল’ড কৰা জিপ্‌ ফাইলটোৰ ভিতৰতে “Azhagi+ typing help” নামৰে পাব। তাৰ লগতে টাস্কবাৰৰ A+ আইকনটো টিপাৰ পিছত “Key mappings- Dynamic help” লিংকটোতো সেইখিনি পাব।

ছফ্টৱেৰটোত ম‍ই পোৱা একমাত্ৰ অসুবিধাটো হ’ল অসমীয়া ভাষাটোৰ চিহ্ন “AS” বুলি ওলোৱাৰ সলনি  “BN” ওলোৱাটো (যদিও ই টাইপিঙত কোনো অসুবিধা নকৰে)। ছফ্টৱেৰটোৰ উদ্ভাৱকজনে ইয়াৰ পিছৰ দুটা সংস্কৰণৰ ভিতৰত এইটো শুধৰাব বুলি কথা দিছে।

ব্যৱহাৰ কৰি কিবা ভুল দেখিলে অনুগ্ৰহ কৰি আঙুলিয়াই দিব। উৎসাহীজনে ভিতৰৰ XML ফাইলটো নিজৰ সুবিধা অনুযায়ী সলাই ল’ব পাৰে।


ডাউনল'ড লিংক:  http://www.mediafire.com/download/fgdgq2lf93bfcui/AzhagiPlus_easy.zip